حبة حاجات .صغيرة

فى حبة حاجات بجد لما بتحصل

بتفرق معايا..هحاول أركز مع وجدانى

واقولكم زى إية زى مثلا

لما يجى وقت أضايق وأحس إن لو كان عندى حاجات معينة بشوفها ناقصانى كانت الدنيا بقت أحلى وأريح ويبعتلى ربنا فى نفس الوقت زى رسايل مشفرة ويقولى أن اللى عندك ده الأهم والأجمل .متزعليش.ساعتها بحس أد إية أنا ممتنة أوى وخجلانة من ربنا

لما ربنا يفتح لى وأدى محاضرة حلوة أسعد بها ويسعد بها طلابى

...ويقولولى يااااه بجد المحاضرة دى فرقت معانا

لما أتقدم يوم فى رسالتى اللى مقصرة فى حقها

وأعمل حاجة جديدة وأتغلب بيها على خوفى

وكسلى اللى بيصاحبونى لما أقرب منها

لما أجى أتذكر أزمة عدت بى والاقينى بابتسم

فجأة لان اللطف اللى كان من ربنا وإحتضان الناس

خلونى افتكر حلوها وأنسى الالامها

لما حد من زمايلى يطلع لى القسم يسأل عليا.

..بحس إنى لو مت متهيألى هفرق معاهم

لما حد يقولى انا علطول بفتكرك وبدعى ليك فى صلاتى

لما استمتع بكوباية شاى بنعناع كان نفسى فيها أوى فى ساعة عصرية

لما أشترى كتاب بحب مؤلفه ...وأفضل شوية أحطة فى شنطتى

..وشوية جانبى على الكومودينو

..وأفضل أطول فى فترة قرايتى له عشان ميخلصش

وأحس ان فى حاجة حلوة مستنية أعملها فى أخر اليوم

لما تيجلى رسالة أو مكالمة غير متوقعة من حد بعتز بيه

لما حد يدور عليا ....ويهمه اشاركه وأكون معاه فى فرحه أو حزنه

لما الاقى إن استجابتى لبذور الحب من أصحابى

كانت فى محلها وبتفرع وتكبر وتنور كل يوم

لما أفكر فى حد وأكلمه ويقولى يااااه بجد القلوب عند بعضها...أنا كنت لسة هكلمك

لما الاقى نعناع أخضر عندنا وابقى سعيدة لانى

بيفكرنى ببثينة بنت خالى (أم فاروق ) حاليا

...اللى حببتنى فى الزرع والنعناع والريحان

لما أكون سعيدة ذى دلوقت وحابة أكتب البوست ده عن الحاجات دى

...ومستنية اسمع منكم إية الحاجات الصغيرة اللى بتفرق معاكم