شتاء 2005
أهدى لى وجيرانى وصديقاتى هدية جميلة كان
نفسى احكى لكم عنها من ساعة ما انشئت المدونة
وهى مسلسل أغانى الشتاء
واللى اسم مدونة صديقتى صاحبة السفينة
على اسمه من حبها له جدا
المسلسل ده حكايته حكاية بدأت الدعاية بتاعته
من أختى عندما تابعت أول حلقة منه
وحكتلى عليه وشوقتنى ورافقتها الحلقة اللى بعتها
وفى اليوم الثالث بقينا ثالثة
وفى اليوم الرابع كنا خمسة ومعانا اتنين جيرانا بنتابع
وفى اليوم الخامس تقريبا كانت معاى صديقتى صاحبة السفينة
وفى السادس العيلة ومصر كلها كانت بتابع
ومش عايز اقولكم طقوس متابعته كانت إزاى
كل واحد فينا ورا حاجة أو مذاكرة
أو مشوار يحاول ينجز قبل الحلقة
ونتابعه فى حالة صمت رهيب
لدرجة أن بابا كان بيضايق مننا
لأنه لما كان ينادى على حد فينا
مبيسمعش حتى لو كان جانبه
ويقول فى اية مالكم كده
ولما كان المسلسل يتأخر شوية عن موعده المعتاد
كنا نجند حد ينتظره ونبلغ الجيران والاصدقاء
أو هما يبلغونا
وبعد المسلسل مقولكمش على التعليقات
والتليفونات اللى نازلة ترن من أصحابنا
عشان نبدأ وصلة تانية لاستعادة أحداث المسلسل
لدرجة إننا حصلنا حالة تمرد وبقينا كلنا عايزين نروح كوريا
كان المسلسل بيعرض قصة جميلة بمنتهى الرومانسية
والرقة
وبرقى وتحضر وشياكة وإحترام
ومكنش فى ولا مشهد مبتذل والمسلسل نجح بتفوق
كبير عن طريق دعاية الجمهور له
وحسبنا الله ونعم الوكيل
فيمن أفسد أذواقنا
وأمطرونا بكل السمك والعنب
والكتاكيت
هناك 22 تعليقًا:
احييك على كلامك عن المسلسل
انا فعلا بحب المسلسل ده جدا
لانه رائع وبيتكلم عن احاسيس جميلة ورقيقة وحقيقية بمنتهى الاحترام والرقى
ياريت يحترموا عقلنا هنا ويقدموا لينا حاجات راقية زى كده
تحياتى
عزيزتى ايمان
ذكرتيني بالمسلسل دة كان جميل فعلا وكنت بحب اتابعة فعلا تحسي وانتى بتتفرجي علية انه لا يمكن يكون تمثيل ومعاكلى حق في البهوات اللي ابتزلوا في الفن لحد ما خلوة عنب على الاخر
بس لو بتستشهدي بشئ كويس وتورينا التناقض احنا عندنا في السينما والتلفزيزن بردة لسة في حاجات قيمة
لكن للأسف اغلبية البرامج الهزيلة والاغاني اللي من وجهة نظري تعتبر خارجة كلها سببها الفضائيات
لأن عنر الرقابة اللي موجود في التليفزيزن مش موجود للأسف في الرقابة معلهمشي يا ايمان راقبة تخليلي
ودة اللي خلنا مش نسمع الغم دو بودانا لأ وبقينا نشوفة متصور
عندك حق حسبنا الل ونعم الوكيل
تحياتي لكي
ياااه
انا عندى كام حلقه منه
المسلسل دا مهما اتفرجت عليه
مزهقش ولا اتنازل عن دمعة واحده المفروض ادمعها فى موقف معين
الجميل اكتر من القصة هو التمثيل
وكتير كنت بقول لأختى وانا متشحتفه من العياط
ان دا مش تمثيل
دا حقيقى
المسلسل كان له قصة حلوة معايا ..وتابعته عبر القاهرة الاقصر واسوان
اخر حلقة شوفتها فى اسوان
مرسى ياجميل انك فكرتينا بحاجة حلوة زى دى
لولا
لحظة تأمل شرفتى المدونة وياريت نشوفك دايما...وبضم صوتى لصوتك ياريت ياريت
دى بتبقى بالصدفة وتقريبا
بيندموا إنهم قدموها
عزيزى سيد
سعيدة بإنك كنت من متابعى المسلسل
أنا كنت بتفكر البنات بس
هى اللى كانت بتشوفه
لكن طلع بردو فى من الشباب من
بتقدر الفن المحترم
ولا يسخر من الرومانسية
تحياتى وتقديرى
سيدة المرتفعات أهلا أهلا بك
ويارب دايما فى العلايلى
المسلسل ده لا يمكن ينسى
ويا بختك بحلقاتك القليلة
أنا عندى حبة صور على موسيقى المسلسل
ذكرى لفن راقى رائع
على العموم شرفتى ونورتى مدونتى
إنها حقا "أغاني الشتاء" التي تصلح لكل الأجواء، ومقال في علم الجمال والنقد يستحق التدريس.
أما حكاية "السمك والعنب والكتاكيت"، فكانت موجودة دائما وستظل موجودة، حتى على أيام عبد الوهاب، ألم يغن": فيك عشرة كوتشينة في البلكونة؟ وعلى أيام أم كلثوم كان في أغاني "أنيل"، مثلا:
مين فيكو بابا
مين فيكو ماما
معرفشي نينه
إلا بعلامه
على العموم، مقالك هذا خير مكافحة للأغاني الردئية ولأي شيء يفتقد الجمال.
شكرا على مقالك الجميل
عميق تحياتي
ضياء
السلام عليكم
اول مرور ليا في مدونتك الرقيقه
واضح جدا انه مسلسل مؤثر
وممتع ونقي من كل ما يخدش الحياء
اتمنى لو ليه لينك على النت
اكون سعيده جدا
تعليق على العنب والكتاكيت
تخيلي لو مفيش اغاني من دي
هل كنا قدرنا نحكم على الأغاني الجديده
والمسلسلات المحترمه بأنها كده...!!!اكيد
لازم نشوف السيء علشان نعرف قيمة الكويس
ايمي الرقيقة جدا ،، جيت اقولك وحشتيني بجد ،، وللأسف أنا مش تابعت اغاني الشتاء بس من اسمه واضح انه كان تحفة ومن عرضك للمسلسل وتأثيره عليك وعلى اصحابك وجيرانك اتمنيت لو شوفته
عموما متابعة اعمال الحب والرماسنية الناعمة الغير مبتذله امر ضروري وصحي في ظل الواقع المغاير تماما
وحشتيني تاني بجد
تحياتي لأحلى ايمان في الدنيا
عايزة اقولك بجد ان المسلسل ده تحفة انا عن نفسي كنت بحس بدفء كبييييييييييير وانا بتفرج عليه من كتر رومانسيته ورقته خلانا نعيش في جو مش موود الايام دي خاااالص . انا على فكرة اول مرة اشترك النهادرة واتمنى انكم ترحبو بيا وابقى خفيفة على قلبكم
soul of love
العزيزة أمونه
يعني طبعا ماحصليش الشرف إني أشوف المسلسل، لكن رحت كوريا وماحبتهاش بسبب حاجتين غلاء الأسعار، والريحة بتاعة الأكل، فبيتهيألي المسلسل ماتعرضش للحاجتين دول.
أنا معاكي في من أفسد اذواقنا، الله يلعنهم جميعا دنيا وآخرة..بس هم مين بالضبط؟
خالص تحياتي وحبي لكي ولكل أصدقائك
بقالي كتير مقرتش حاجة ليكي وكدة مش حلو
تحياتي ومودتى
تصدقي وتؤمني بالله
انا كل ما كنت ادخل المدونه واجي اقرا البوست ده الاقي حاجه تحصللي تخليني اقوم من غير ما اقراه
النهارده قلت لا للظروف .. انا هقرى البوست واللي يحصل يحصل
وقريته
ومن كتر مانتي شديتيني للمسلسل ده
باطلب منك طلب
الله يكرمك لو تعرفي مكان سايت او موقع او اي حد عنده المسلسل ده تقوليلي لاني اشتقت اشوفه جدا جدا جدا
وسلامووووووز
الاستاذ الدكتور ضياء ...بيسعدنى دايما مرورك وسعيدة انك بتقول على شخابيطى المتواضعة كلام جميل
كل الشكر والتحية
زمردة الجميلة
كل الشكر على الزيارة
وعينى حاضر بالنسبة لسيت يكون فى المسلسل
كان عندى للأسف وضاع
بس هشوفه مع أحد أصدقائى
وواضح أن العمل الجيد بيعمل دعاية لنفسه...ومش محتاجة وسطة ولا مهرجانات
وياريت تشرفينى تانى
كل المودة والتحية
نورسين حبيبتى وانتى كمان وحشتينى جدا
ونفسى كده اشوفك يارب عن قريب
عجبتنى كلماتك يا أحلى نورسين
كل الود والحب
أوديو العزيزة
نورتى واهلا بك والرحب والسعة
جبتى المفيد دفء جميل يتسرب كان يتسرب
الينا ويسكننا من خلال احترام وفن راقى
تحياتى واهلا بيكى علطول
العزيز الجميل أبى زين
عامل اية فينك مشوفتكش من زمان
شكرا لمرورد الجميل
بس تعرف حتى لو الاسعار نار
والاكله رائحته مش حلوة
عايزا اروح كوريا
مودتى وتحياتى
مكسرات
شكرا للسؤال اللى بجد اسعدنى
وهحاول انفض الاكتئاب واكتب حاجة
تحياتى وشكرى
الاستاذ سوووووووووو
أنا مجرد ما شوفت اسمك ابتسمت
ولو لما عرفت المخاطر والعواقب اللى
أحاطت قراءة البوست هلكتنى من الضحك
بس عايزا اطمن كله خير يعنى
أما بالنسبة للمسلسل
ففى صديقة ليا عندها موقعه هجيبه ليكم عينى
تحياتى وشكرى
وااااااااااااااسفة انى تاخرت عليكم فى الرد لانى اصابت باكتئاب
ومكنتش عايزا اعمل اي حاجة
أنا بدأت أخاف تكوني مخاصماني وأنا مش واخدة بالي ؟؟؟؟؟؟
كوني بخير
عزيزتى ايمان
حكاوي المكسرات في انتظارك بوست جديد
تحياتي
كل سنة وانت طيبة، وارجو ان يكون احتجابك عن التدوين لظروف عادية وأن يكون كل شيء يسير سيرا طبيعيا.
كل سنة وكل الناس بخير وسعادة
عميق تحياتي
ضياء
كل سنة وانت طيبة وعام سعيد عليك وعلى اسرتك إن شاء الله
عميق تحيتي وخالص مودتي
ضياء
هابى نيو يير ... وحاجات حلوة وطراطير .... وجاتوه وفطير....والأهلي خطير ..... والريس لسه قدامه كتير
كل سنة وانتي جميلة ويارب تكون سنة سعيدة وتحققي فيها كل اللي تتمنيه بس حضرتك غايبة عننا كدة ليه انتي وحشاااااااااااااااااني كتييييييييييير يارب تكوني بخير ومستانية من حضرتك ندونة جديدة جامدة ورقيقة زيك
مع حبي
آيوتة
المسلسل دا عمل هوس لدى المحبين ومرهفين الحس يا هانم والناس الى قلبها فاضى ونفسه يحب زى الناس دى
الناس دى ابدعت واحتلتنا احتلال من اخر راقى وهو احتلال المشاعر والرغبة فى المحاكاة لزوقهم ورقتهم وطريقه حبهم وصبرهم وإيمانهم الشديد بالنهايات القدرية الى حتى الألم فيها بيكون ممزوج بالحب لا كل الى عاوزة اقول انهم مبدعين ويستحقو النجاح . وانا يا جماعة عندى اغانى كتير من المسلسل وصور بالهبل لأى حد يحب عونيا ليكم كلمك ولصحبة الشخابيط
ذكريتى مع هذا المسلسل رائعة ولن انساها قمة الرمانسية والمحافظة على الصداقة والحب والاحترم
إرسال تعليق